barres

Barres, en pluriel se prend ores pour exceptions et defenses, par lesquelles on s'eschappe de la demande d'aucun, Exceptio, Selon ce les notaires au pays de Normandie usoient anciennement de ceste clause és contracts qu'ils passoient: Renoncerent chacun pour soy à toutes actions, exceptions, barres et defenses, et à toutes autres choses pourquoy ce qu'a esté passé puisse estre empesché ne destourbé par quelque voye que ce soit, Selon ce, aussi on dit, J'ay barres sur vous, pour, J'ay advantage et prinse sur vous. tibi praeualeo, Si cela toutesfois ne vient du jeu de Barres, lequel se jouë par deux bandes l'une front à front de l'autre en plaine campagne, saillans de leurs rangs les uns sur les autres file à file, pour tascher à se prendre prisonniers, là où le premier qui attaque l'escarmouche est sous les barres de celuy de la bande opposite qui sort sur luy, et cestuy sous les barres de celuy qui de l'autre part saut en campagne sur luy, et ainsi les uns sur les autres, tant que les deux trouppes soient entierement meslées, Palaestra, Ayant paradvanture tel jeu prins tel nom par ce que telles bandes estoient retenues de barrieres qu'on leur ouvroit, quand il estoit proclamé qu'on laissast aller les vaillans joüeurs, que les Latins appellent Carceres, Barres se prend aussi pour l'endroit de la maschoire du cheval où les Escuyers d'escuyrie esperonniers prennent leur mire pour la juste penture du mors du cheval.

Jouër aux barres, Vacare palaestrae.

Joueur de barres, Palaestrita.

En jouëur de barres, Palestrice.

L'art de jouër aux barres, Ars palaestrica.

Thresor de la langue françoyse. Jean Nicot.